Մարդու մեջ գոյություն ունի միայն թվացյալ ներկա և թվացյալ բացակա «հավատ» բառը, սակայն մարդը չգիտի, թե ինչ է նշանակում հավատալ, առավել ևս, թե ինչու պետք է հավատա։ Մարդը չափազանց քիչ բան է հասկանում, և մարդը չափազանց շատ պակասություններ ունի. նա պարզապես հիմարաբար ու տգիտորեն է հավատում Ինձ։ Թեև նա չգիտի, թե ինչ է հավատը, ոչ էլ թե ինչու է հավատում Ինձ, շարունակում է մոլեռանդորեն հավատալ Ինձ։ Այն, ինչ պահանջում եմ մարդուց, լոկ այն չէ, որ այսկերպ մոլեռանդորեն կանչի Ինձ կամ անփութորեն հավատա Ինձ, քանզի գործը, որ անում եմ, նրա համար է, որ մարդը տեսնի Ինձ և ճանաչի Ինձ, ոչ թե նրա համար, որ մարդը նոր լույսի ներքո նայի Ինձ։ Ժամանակին Ես բազմաթիվ նշաններ ու հրաշագործություններ եմ դրսևորել և բազմաթիվ հրաշքներ գործել, և այն ժամանակվա իսրայելացիները մեծ հիացմունք էին ցուցաբերում Իմ հանդեպ և մեծապես պատվում էին հիվանդներին բուժելու և դևերին դուրս հանելու Իմ բացառիկ զորություններից։ Այն ժամանակ հրեաները կարծում էին, որ Իմ բուժիչ զորությունները վարպետորեն են և արտասովոր, և քանի որ այդքան շատ գործ էի արել, նրանք բոլորը հարգանքով էին նայում Ինձ և շատ էին նախանձում Իմ բոլոր զորություններին։ Այսպիսով՝ բոլորը, ովքեր տեսնում էին, թե ինչպես եմ հրաշքներ գործում, սերտորեն հետևում էին Ինձ, այնպես որ հազարավոր մարդիկ շրջապատում էին Ինձ՝ դիտելու, թե ինչպես եմ բուժում հիվանդներին։ Ես այնքան շատ նշաններ ու հրաշքներ դրսևորեցի, սակայն մարդն Ինձ պարզապես որպես վարպետ բժշկի էր նայում։ Այդպես էլ շատ խոսքեր ասացի՝ ուսուցանելու այն ժամանակվա մարդկանց, սակայն նրանք Ինձ պարզապես ուսուցիչ էին համարում, որը գերազանցում է իր աշակերտներին։ Նույնիսկ այսօր, երբ մարդը տեսել է Իմ գործի պատմական արձանագրությունները, նրա մեկնաբանությունը շարունակում է մնալ այն, որ Ես մեծ բժիշկ եմ, որը բուժում է հիվանդներին, և ուսուցիչ՝ տգետների համար, և նա Ինձ սահմանափակել է որպես ողորմած Տեր Հիսուս Քրիստոս։ Նրանք, ովքեր մեկնաբանում են Սուրբ Գրվածքները, գուցե գերազանցել են բուժելու Իմ «հմտությունները», կամ գուցե նույնիսկ աշակերտներ են, որոնք այժմ գերազանցել են իրենց ուսուցչին, սակայն մեծ համբավ ունեցող այդպիսի մարդիկ, որոնց անունները հայտնի են ամբողջ աշխարհում, Ինձ այնքան են նսեմացնում, որ լոկ բժիշկ են համարում։ Իմ գործերն այնքան բազմաթիվ են, դրանք թվով ավելի շատ են, քան ավազահատիկները ծովափերին, և Իմ իմաստությունն այնքան մեծ է, որ գերազանցում է Սողոմոնի բոլոր որդիների իմաստությանը, սակայն մարդը պարզապես հավատում է Ինձ այնպես, կարծես աննշան բժիշկ լինեմ և մարդու անհայտ ուսուցիչ։ Այնքան շատերն են հավատում Ինձ միայն նրա համար, որ բուժեմ իրենց։ Այնքան շատերն են հավատում Ինձ միայն նրա համար, որ Իմ զորությունն օգտագործեմ՝ իրենց մարմիններից անմաքուր հոգիներին քշելու համար, և այնքան շատերն են հավատում Ինձ պարզապես նրա համար, որ Ինձնից խաղաղություն և ուրախություն ստանան։ Այնքան շատերն են հավատում Ինձ միայն նրա համար, որ Ինձնից ավելի մեծ նյութական հարստություն պահանջեն։ Այնքան շատերն են հավատում Ինձ պարզապես նրա համար, որ այս կյանքն անցկացնեն խաղաղության մեջ և հաջորդ կյանքում ապահով ու անվնաս լինեն։ Այնքան շատերն են հավատում Ինձ՝ դժոխքի տառապանքից խուսափելու և երկնքի օրհնությունները ստանալու համար։ Այնքան շատերն են հավատում Ինձ միայն ժամանակավոր մխիթարության համար, սակայն չեն ձգտում հաջորդ կյանքում որևէ բան ձեռք բերելու։ Երբ Իմ բարկությունն եմ տալիս մարդուն և խլում եմ ողջ ուրախությունն ու խաղաղությունը, որ նա ժամանակին ուներ, նա կասկածամիտ է դառնում։ Երբ մարդուն տալիս եմ դժոխքի տառապանքը և ետ եմ վերցնում երկնքի օրհնությունները, նա կատաղությամբ է լցվում։ Երբ մարդը խնդրում է Ինձ բուժել իրեն, իսկ Ես ուշադրություն չեմ դարձնում նրան և նողկանք եմ զգում նրա հանդեպ, նա հեռանում է Ինձնից՝ փոխարենը փնտրելով չար բժշկության և կախարդության միջոցները։ Երբ վերցնում եմ այն ամենը, ինչ մարդը պահանջել է Ինձնից, նա անհետանում է առանց հետքի։ Այսպիսով՝ Ես ասում եմ, որ մարդը հավատում է Ինձ, որովհետև Իմ շնորհը չափազանց առատ է։ Մարդը հավատում է Ինձ, որովհետև ձեռք բերելու չափազանց շատ օգուտներ կան։ Հրեաների տան մարդիկ հավատում էին Ինձ Իմ շնորհի համար և հետևում էին Ինձ, ուր էլ որ գնայի։ Սահմանափակ գիտելիքներ և փորձառություն ունեցող այս տգետ մարդիկ ձգտում էին միայն տեսնելու այն նշաններն ու հրաշքները, որոնք դրսևորում էի։ Նրանք Ինձ համարում էին հրեաների տան գլխավորը, որը կարող էր ամենամեծ հրաշքները գործել։ Եվ այսպես, երբ մարդկանց միջից դևեր էի հանում, դա մեծ քննարկում առաջացրեց այդ տգետ մարդկանց շրջանում։ Նրանք ասում էին, որ Ես Եղիան եմ, որ Մովսեսն եմ, որ բոլոր մարգարեներից ամենահինն եմ, որ բոլոր բժիշկներից ամենամեծն եմ։ Բացի Ինձնից, որ ասում էի, թե Ես եմ կյանքը, ճանապարհը և ճշմարտությունը, ոչ ոք չէր կարող իմանալ Իմ էությունը կամ Իմ ինքնությունը։ Բացի Ինձնից, որ ասում էի, թե երկինքն այն վայրն է, որտեղ ապրում է Իմ Հայրը, ոչ ոք չգիտեր, որ Աստծու Որդին եմ, ինչպես նաև Ինքը՝ Աստված։ Բացի Ինձնից, որ ասում էի, թե փրկագնում կբերեմ ողջ մարդկությանը և կփրկագնեմ մարդկությանը, ոչ ոք չգիտեր, որ մարդկության Փրկագնիչն եմ, և մարդն Ինձ ճանաչում էր միայն որպես բարեսիրտ և ողորմած անձնավորության։ Եվ բացի Ինձնից, որ ի վիճակի էի բացատրելու այն ամենը, ինչ Ես եմ, ոչ ոք չէր ճանաչում Ինձ, և ոչ ոք չէր հավատում, որ կենդանի Աստծու Որդին եմ։ Այսպիսին է մարդու հավատն Իմ հանդեպ, և այն ձևը, որով նա փորձում է հիմարացնել Ինձ։ Ինչպե՞ս կարող էր նա վկայություն բերել Ինձ համար, երբ Իմ մասին նման տեսակետներ ունի։

Մարդը հավատում է Ինձ, բայց անկարող է վկայություն կրել Ինձ համար, ոչ էլ կարող է վկայություն բերել Ինձ նախքան Իմ հայտնվելը։ Մարդը տեսնում է միայն, որ գերազանցում եմ արարածներին և բոլոր սրբացված մարդկանց և տեսնում է, որ գործը, որն անում եմ, մարդը չի կարող անել։ Այսպիսով՝ հրեաներից մինչև մեր օրերի մարդիկ, բոլոր նրանք, ովքեր տեսնում են Իմ փառավոր գործերը, Իմ հանդեպ լոկ հետաքրքրասիրությամբ են լցվել, սակայն ոչ մի արարածի բերան չի կարողացել վկայություն բերել Ինձ։ Միայն Իմ Հայրն է վկայել Իմ մասին և ճանապարհ հարթել Ինձ համար բոլոր արարածների մեջ։ Եթե Նա դա չաներ, անկախ նրանից, թե ինչ կանեի, մարդը երբեք չէր իմանա, որ Արարիչն եմ, քանզի մարդը գիտի միայն վերցնել Ինձնից և Իմ արածի պատճառով չի հավատում Ինձ։ Մարդը ճանաչում է Ինձ միայն այն պատճառով, որ անմեղ եմ և բնավ մեղսագործ չեմ, որովհետև կարող եմ բացատրել բազմաթիվ խորհուրդներ, որովհետև վեր եմ բազմությունից, կամ որովհետև մարդն օգուտ է քաղել Ինձնից, սակայն քչերն են հավատում, որ Արարիչն եմ։ Ահա թե ինչու եմ ասում, որ մարդը չգիտի, թե ինչու պետք է հավատա Ինձ։ Նա չգիտի Ինձ հավատալու նպատակը կամ նշանակությունը։ Մարդու իրականությունը չափազանց պակասավոր է, այնպես որ նա հազիվ է պիտանի Ինձ համար վկայություն կրելու։ Դուք չափազանց քիչ ճշմարիտ հավատ ունեք և չափազանց քիչ բան եք ձեռք բերել, ուստի չափազանց քիչ վկայություն ունեք։ Ավելին՝ չափազանց քիչ եք հասկանում և չափազանց շատ պակասություններ ունեք, այնպես որ հազիվ եք համապատասխանում Իմ գործերի մասին վկայություն բերելու պահանջին։ Ձեր վճռականությունն իսկապես զգալի է, բայց արդյոք իսկապես կարո՞ղ եք վստահ լինել, որ ի վիճակի կլինեք վկայություն բերելու Աստծու էության մասին։ Այն, ինչ փորձառաբար ապրել և տեսել եք, գերազանցում է բոլոր դարերի սրբերի և մարգարեների փորձառաբար ապրածին ու տեսածին, բայց արդյոք ի վիճակի՞ եք Ինձ համար ավելի մեծ վկայություն կրելու, քան անցյալ ժամանակների այդ սրբերի և մարգարեների խոսքերն են։ Այն, ինչ այժմ շնորհում եմ ձեզ, ավելի բարձր է, քան այն, ինչ ստացավ Մովսեսը, և գերազանցում է այն, ինչ ստացավ Դավիթը, ուստի նմանապես պահանջում եմ, որ ձեր վկայությունը գերազանցի Մովսեսի վկայությանը, և ձեր խոսքերը գերազանցեն Դավթի խոսքերին։ Ես հարյուրապատիկ եմ տալիս ձեզ, ուստի նմանապես պահանջում եմ, որ հարյուրապատիկ հատուցեք Ինձ։ Դուք պետք է իմանաք, որ Ես եմ մարդկությանը կյանք շնորհողը, և դուք եք Ինձնից կյանք ստացողը ու պետք է Ինձ համար վկայություն կրեք։ Սա ձեր պարտավորությունն է, որն ուղարկում եմ ձեզ վրա, և որը պետք է կատարեք Ինձ համար։ Ես Իմ ողջ փառքը շնորհել եմ ձեզ և շնորհել եմ ձեզ այն կյանքը, որն Իսրայելի ընտրյալ ժողովուրդը երբեք չի ստացել։ Դուք պետք է վկայեք Իմ մասին, նվիրեք Ինձ ձեր երիտասարդությունը և զոհեք ձեր կյանքը։ Ում որ շնորհում եմ Իմ փառքը, պետք է վկայի և իր կյանքը տա Ինձ համար։ Սա վաղուց կանխորոշված է Իմ կողմից։ Սա Օրհնություն է, որ Իմ փառքը շնորհում եմ ձեզ, և ձեր պարտավորությունն է վկայություն բերել Իմ փառքի մասին։ Եթե հավատայիք Ինձ միայն օրհնությունների համար, ապա Իմ գործը շատ քիչ նշանակություն կունենար, և դուք չէիք կատարի ձեր պարտավորությունը։ Իսրայելացիները տեսան միայն Իմ ողորմությունը, սիրառատ բարությունը և մեծությունը, իսկ հրեաները վկա եղան միայն Իմ համբերությանն ու փրկագնմանը։ Նրանք շատ ու շատ քիչ բան տեսան Իմ Հոգու գործից, և նույնիսկ այնպես էր, որ նրանց հասկացածը ձեր լսածի ու տեսածի լոկ մեկ տասհազարերորդն էր։ Այն, ինչ տեսել եք, գերազանցում է նույնիսկ նրան, ինչ տեսել են նրանց քահանայապետերը։ Ճշմարտությունները, որոնք այսօր հասկանում եք, գերազանցում են նրանց հասկացածին։ Այն, ինչ այսօր տեսել եք, գերազանցում է Օրենքի դարաշրջանում, ինչպես նաև Շնորհքի դարաշրջանում տեսածին, և այն, ինչ փորձառաբար ապրել եք, գերազանցում է նույնիսկ Մովսեսի ու Եղիայի փորձառությանը։ Քանզի իսրայելացիների հասկացածը միայն Եհովայի օրենքն էր, և նրանց տեսածը միայն Եհովայի մեջքն էր։ Հրեաները հասկացածը միայն Հիսուսի փրկագնումն էր, նրանց ստացածը միայն Հիսուսի շնորհած շնորհն էր, և նրանց տեսածը միայն Հիսուսի պատկերն էր հրեաների տան մեջ։ Այն, ինչ այսօր տեսնում եք, Եհովայի փառքն է, Հիսուսի փրկագնումը և բոլոր այն գործերը, որոնք այժմ կատարում եմ։ Դուք նաև ձեր սեփական ականջներով լսում եք Իմ Հոգու խոսքերը, ձեռք եք բերել Իմ իմաստության գնահատումը, ճանաչել եք Իմ հրաշալիությունը և իմացել եք Իմ բնույթի մասին։ Ես նաև վերցրել եմ Իմ ողջ տնօրինման ծրագիրը և այն ձեզ պատմել։ Այն, ինչ տեսել եք, լոկ սիրող և ողորմած Աստված չէ, այլ արդարությամբ լի Աստված։ Դուք տեսել եք Իմ գործի հրաշալիությունը և իմացել, որ լի եմ մեծափառությամբ ու ցասումով։ Առավել ևս տեղյակ եք, որ ժամանակին Իմ մոլեգնությունը թափեցի Իսրայելի տան վրա, և որ այն այժմ եկել է ձեզ վրա։ Դուք երկնքում եղող Իմ խորհուրդներից ավելին եք հասկանում, քան Եսային ու Հովհաննեսը։ Դուք Իմ հաճելիության և պատկառելիության մասին ավելին գիտեք, քան անցյալ դարերի բոլոր սրբերը։ Այն, ինչ ստացել եք, լոկ Իմ ճշմարտությունը, Իմ ճանապարհը և Իմ կյանքը չէ, այլ ավելի մեծ տեսիլքներ ու հայտնություններ, քան ստացավ Հովհաննեսը։ Դուք ավելի շատ խորհուրդներ եք հասկանում և նաև նայել եք Իմ ճշմարիտ դեմքին։ Դուք ավելին եք ստացել Իմ դատաստանից և ավելին գիտեք Իմ արդար բնույթի մասին։ Եվ այսպես, թեև ծնվել եք վերջին օրերում, հասկանում եք նախկինում եղած բաները և անցյալի բաները և նաև փորձառաբար ապրել եք այսօրվա բաները, որոնք Ես անձամբ եմ արել։ Այն, ինչ պահանջում եմ ձեզնից, չափազանցված չէ, քանզի այնքան շատ բան եմ տվել ձեզ, և դուք այնքան շատ բան եք տեսել Իմ մեջ։ Այսպիսով՝ պահանջում եմ, որ վկայություն բերեք Ինձ համար անցյալ դարերի սրբերին, և սա Իմ սրտի միակ ցանկությունն է։

Սկզբում Իմ Հայրն էր, որ վկայեց Իմ մասին, բայց Ես ցանկանում եմ ավելի մեծ փառք ձեռք բերել, և կամենում եմ, որ վկայության խոսքերը հնչեն արարածների շուրթերից. ուստի Իմ ողջ ունեցածը տալիս եմ ձեզ, որպեսզի կատարեք ձեր պարտավորությունը, որպեսզի մարդկանց մեջ Իմ գործը հասնի իր ավարտին։ Դուք պետք է հասկանաք, թե ինչու եք հավատում Ինձ։ Եթե միայն ուզում եք լինել Իմ «աշակերտը» կամ Իմ «հիվանդը» կամ դառնալ Իմ սրբերը երկնքում, ապա Ինձ հետևելն անիմաստ կլինի։ Այսպես Ինձ հետևելը լոկ իզուր կվատնի ձեր եռանդը, և այսպես Ինձ հավատալը միայն կվատնի ձեր ժամանակը և կմսխի ձեր երիտասարդությունը։ Ի վերջո ոչինչ ձեռք չեք բերի։ Մի՞թե դա իզուր դավադրություններ անել չէր լինի։ Վաղուց հեռացել եմ հրեաների միջից և այլևս մարդու բժիշկը չեմ, ոչ էլ մարդու համար լավ դեղամիջոց։ Այլևս բեռնակիր անասուն չեմ, որին մարդը կարող է քշել կամ մորթել իր կամքով. փոխարենը եկել եմ մարդկանց մեջ՝ դատելու և հանդիմանելու մարդուն, որպեսզի մարդը ճանաչի Ինձ։ Պետք է իմանաս, որ ժամանակին կատարել եմ փրկագնման գործը։ Ժամանակին Հիսուսն էի, բայց չէի կարող հավերժ Հիսուս մնալ, ճիշտ ինչպես ժամանակին Եհովան էի, բայց հետո դարձա Հիսուս։ Ես մարդկության Աստված եմ, Արարիչը, բայց չեմ կարող հավերժ մնալ Հիսուս կամ Եհովա։ Ժամանակին այն էի, ինչ մարդը համարում է բժիշկ, բայց դա ցույց չի տալիս, որ Աստված լոկ բժիշկ է մարդկության համար։ Ուստի, եթե Ինձ հավատալիս հին տեսակետներ ունենաս, ապա ոչնչի չես հասնի։ Որքան էլ այսօր գովաբանես Ինձ. «Աստված այնքան շատ է սիրում մարդուն։ Նա բուժում է ինձ և ինձ օրհնություններ, խաղաղություն և ուրախություն է տալիս։ Որքան բարի է Աստված մարդու հանդեպ։ Քանի դեռ հավատում ենք Նրան, կարիք չկա անհանգստանալու փողի համար…», միևնույն է, չեմ կարող խաթարել Իմ սկզբնական գործը։ Եթե այսօր հավատում ես Ինձ, կստանաս միայն Իմ փառքը և իրավունք կունենաս վկայություն բերելու Ինձ համար, իսկ մնացած ամեն ինչ երկրորդական կլինի։ Սա պետք է հստակ իմանաս։

Արդյոք հիմա իսկապե՞ս գիտես, թե ինչու պետք է հավատաս Ինձ։ Իսկապե՞ս գիտես Իմ գործի նպատակն ու նշանակությունը։ Իսկապե՞ս գիտես քո պարտավորությունը։ Իսկապե՞ս գիտես, թե որն է Իմ վկայությունը։ Եթե պարզապես հավատում ես Ինձ, սակայն քո մեջ Իմ փառքի կամ վկայության նշույլ անգամ չկա, ապա մեկն ես, ում վաղուց դուրս եմ թողել։ Ինչ վերաբերում է նրանց, ովքեր ամեն ինչ հասկանում են, նրանք է՛լ ավելի շատ են փուշ Իմ աչքում, և Իմ տան մեջ նրանք ոչ այլ ինչ են, քան խոչընդոտներ Իմ ճանապարհին, նրանք որոմներ են, որոնք պետք է ամբողջությամբ քամհարվեն Իմ գործի մեջ, և նրանք որևէ օգուտ չունեն, բնավ կշիռ չունեն և վաղուց արհամարհված են Իմ կողմից։ Ինչ վերաբերում է բոլոր նրանց, ովքեր բնավ վկայություն չունեն, Իմ բարկությունը միշտ նրանց վրա է, և Իմ գավազանը երբեք չի հեռանում նրանցից։ Վաղուց նրանց հանձնել եմ չարի ձեռքը. նրանք լիովին զրկված են Իմ օրհնություններից։ Երբ գա օրը, նրանց պատիժն ավելի ծանր կլինի, քան նույնիսկ հիմար, համառ կանանց պատիժը։ Այսօր անում եմ միայն այն գործը, որն Իմ պարտավորությունն է՝ ողջ ցորենը այդ որոմների հետ միասին խրձերի մեջ կապելով։ Սա է Իմ գործն այսօր։ Երբ քամհարեմ, կքամհարեմ այս բոլոր որոմները. դրանից հետո ցորենի հատիկները կհավաքեմ շտեմարանում և քամհարված որոմները կգցեմ կրակի մեջ, որպեսզի այրվեն ու մոխիր դառնան։ Իմ գործն այժմ լոկ բոլոր մարդկանց խրձերի մեջ կապելն է՝ այսինքն՝ նրանց լիովին նվաճելը։ Այն ժամանակ կսկսեմ քամհարել՝ բացահայտելու բոլոր մարդկանց ելքերը։ Եվ այսպես պետք է իմանաս, թե ինչպես պետք է բավարարես Ինձ հիմա և ինչպես պետք է ճիշտ ուղու վրա կանգնես Ինձ հավատալու հարցում։ Այն, ինչ ցանկանում եմ հիմա, քո հավատարմությունն ու հնազանդությունն է, քո սերն ու վկայությունը։ Նույնիսկ եթե այս պահին չգիտես, թե ինչ է վկայությունը կամ ինչ է սերը, պետք է Ինձ բերես քո ողջ ունեցածը և Ինձ հանձնես քո ունեցած միակ գանձերը՝ հավատարմությունդ ու հնազանդությունդ։ Պետք է իմանաս, որ Սատանային Իմ հաղթելու վկայությունը գտնվում է մարդու հավատարմության և հնազանդության մեջ, ինչպես և մարդուն Իմ լիակատար նվաճելու վկայությունը։ Ինձ հավատալու քո պարտավորությունն Ինձ համար վկայություն բերելն է, Ինձ և ուրիշ ոչ մեկին հավատարիմ լինելը և մինչև վերջ հնազանդ լինելը։ Նախքան Իմ գործի հաջորդ քայլը կսկսեմ, ինչպե՞ս պետք է վկայություն կրես Ինձ համար։ Ինչպե՞ս պետք է հավատարիմ և հնազանդ լինես Ինձ։ Արդյոք նվիրվածություն կցուցաբերե՞ս քո գործառույթին, թե՞ պարզապես կթողնես այն։ Կնախընտրեի՞ր հնազանդվել այն ամենին, ինչ կարգավորում եմ քեզ համար (նույնիսկ եթե դա նշանակում է, որ պետք է մահանաս կամ կորչես), թե՞ կես ճանապարհից կփախչեիր՝ Իմ հանդիմանությունից խուսափելու համար։ Ես հանդիմանում եմ քեզ, որպեսզի վկայություն կրես Ինձ համար և հավատարիմ ու հնազանդ լինես Ինձ։ Կարելի է նաև ասել, որ ընթացիկ հանդիմանությունը հանուն Իմ գործի հաջորդ քայլն իրականացնելու է և ապագա գործի անխոչընդոտ առաջընթացի համար։ Ուստի հորդորում եմ քեզ իմաստուն լինել և ո՛չ քո կյանքին, ո՛չ էլ քո գոյության նշանակությանը չվերաբերվել որպես անարժեք ավազի։ Կարո՞ղ ես ճշգրտորեն իմանալ, թե որն է լինելու Իմ գալիք գործը։ Գիտե՞ս, թե ինչպես եմ գործելու ապագայում և ինչպես եմ իրականացնելու Իմ գործը։ Պետք է իմանաս Իմ գործը փորձառաբար ապրելու նշանակությունը և առավել ևս Ինձ հավատալու նշանակությունը։ Այնքան շատ գործ եմ արել. ինչպե՞ս կարող էի կես ճանապարհին հանձնվել, ինչպես դու ես պատկերացնում։ Այնպիսի մեծ գործ եմ սկսել. ինչպե՞ս կարող էի քանդել այն։ Ճիշտ է, որ եկել եմ այս դարաշրջանն ավարտին հասցնելու համար, բայց ավելի կարևոր է՝ պետք է իմանաս, որ եկել եմ նոր դարաշրջան սկսելու համար, որ եկել եմ նոր գործ իրականացնելու համար, և առավել ևս, որ եկել եմ թագավորության ավետարանը տարածելու համար։ Ուստի պետք է իմանաս, որ ընթացիկ գործը լոկ դարաշրջան սկսելու և գալիք ժամանակում ավետարանը տարածելու ու ապագայում դարաշրջանն ավարտին հասցնելու համար հիմք դնելու համար է։ Իմ գործն այնքան պարզ չէ, որքան դու ես պատկերացնում, ոչ էլ այնքան անարժեք կամ անիմաստ է, որքան գուցե կարծում ես։ Հետևաբար, դեռ պետք է ասեմ քեզ. դու պետք է քեզ ընծայես Իմ գործին և առավել ևս քեզ նվիրես հանուն Իմ փառքի։ Այն, ինչը առավել ևս վաղուց փափագել եմ, այն է, որ դու վկայություն կրես Ինձ համար։ Եվ առավել ևս շատ երկար եմ սպասել՝ տեսնելու, թե ինչպես ես տարածում Իմ ավետարանը։ Դու պետք է հասկանաս, թե ինչ կա Իմ սրտում։