Վերադաս եղբոր հաղորդակցությունը – 25-ը նոյեմբերի, 2025թ. (Մաս 5)

Հարց 3։ Ինչպե՞ս պետք է հետամուտ լինենք առաջնորդողների, աշխատողների և խմբերի ղեկավարների աշխատանքին, որպեսզի նրանք ավելի մեծ հոգս զգան իրենց պարտավորությունների մեջ։

Պատասխան։ Ո՞րն է մարդկանց բոլոր խնդիրների և դժվարությունների հիմնական պատճառը։ Դա ճշմարտությունը թերի հասկանալն է։ Այդ դեպքում ինչո՞ւ մարդիկ հոգս չեն զգում իրենց պարտավորություններում։ Սա նույնպես այն պատճառով է, որ մարդիկ չեն հասկանում ճշմարտությունը։ Նրանք չգիտեն իրենց պարտավորությունները կատարելու նշանակությունն ու արժեքը։ Երբ նրանք ճանաչեն և գնահատեն այս բաները, հոգս կունենան իրենց պարտավորության մեջ։ Ասացե՛ք ինձ՝ եթե մարդիկ պարտավորություն չեն կատարում և պարզապես հավատում են Աստծուն տանը՝ կրոնական մարդկանց պես, որոնք միայն կիրակի օրերին են գնում եկեղեցի, ի՞նչ կարող են նրանք ձեռք բերել։ Կարո՞ղ են արդյոք ճշմարտություն ձեռք բերել։ (Ո՛չ։) Նրանք, ովքեր հոգսի զգացում չունեն իրենց պարտավորություններում, չեն կարող հստակ տեսնել այս հարցը և չգիտեն, թե որն է պարտավորություն կատարելու նշանակությունը։ Իրականում, պարտավորություն կատարելն Աստծու պահանջն է նրանց համար, ովքեր ճշմարտապես հավատում են Նրան։ Եթե ճշմարտապես կատարես քո պարտավորությունը և կարողանաս այն լավ կատարել, ապա ճշմարտություն ձեռք կբերես։ Եթե պարտավորություն չկատարես, այլ ազատ ժամանակ պարզապես հավատաս Աստծուն, քեզ համար շատ դժվար կլինի մտնել ճշմարտության իրականության մեջ։ Մասնավորապես, քանի որ վերջին օրերի գործի այս փուլը շատ կարճ է լինելու, եթե Աստծու հանդեպ քո հավատքի մեջ միայն հավաքույթների հաճախես, բայց պարտավորություն չկատարես, ապա ճշմարտությունը կամ Աստծու փրկությունը ձեռք չես բերի։ Այսքան մեծ է պարտավորություն կատարողների և չկատարողների միջև տարբերությունը։ Նույնիսկ նրանք, ովքեր իրենց օրերն անց են կացնումպարտավորություններով զբաղված, գուցե ճշմարտությունը ձեռք չբերեն, ուր մնաց նրանք, ովքեր ընդհանրապես պարտավորություն չեն կատարում։ Պարտավորություն չկատարող մարդիկ ճշմարտությունը ձեռք չեն բերի, նույնիսկ եթե քսան կամ երեսուն տարի հավատան Ամենակարող Աստծուն։ Կարելի է ասել, որ նման մարդիկ շատ չեն տարբերվում անհավատներից։ Ճշմարտությունը ձեռք բերելը տարբերվում է հմտություն սովորելուց։ Հմտությունը մեռած բան է, և այն կյանքը չէ։ Կարող ես այն սովորել ազատ ժամանակ, և երբ հիշես դրա քայլերը, ուրեմն այն սովորած կլինես։ Սակայն ճշմարտությունը մեռած բան չէ։ Ճշմարտությունը կյանք է։ Այն կարելի է ձեռք բերել միայն մարդկանց գործնական փորձառության միջոցով։ Որքան ավելի խորը լինի քո փորձառությունը, այնքան ավելի հիմնովին կհասկանաս ճշմարտությունը և այնքան ավելի շատ կկարողանաս ձեռք բերել ճշմարտությունը։ Եթե քո փորձառությունը չափազանց մակերեսային է, ապա ճշմարտություն ձեռք չես բերի։ Օրինակ՝ ինչ վերաբերում է ազնիվ լինելու ճշմարտությանը, քանի՞ տարվա փորձառության միջով պետք է մարդն անցնի, մինչև որ կարողանա այն կիրարկել և մաքրել ստերը սեփական բերանից։ Նման բան հնարավոր չէ անել յոթ կամ ութ տարուց պակաս ժամանակում։ Սա մի եզրակացություն է, որին ես հանգել եմ իմ անձնական փորձառության միջոցով։ Մարդ պետք է փորձառաբար ապրի ազնիվ լինելու ճշմարտությունն առնվազն յոթ կամ ութ տարի։ Եթե փորձառության ժամանակը չափազանց կարճ է, ոչ մի արդյունք ձեռք չի բերվի։ Գուցե բնականոն հանգամանքներում չես ստում, բայց ո՞վ գիտի, թե երբ կարող ես հայտնվել մի հատուկ իրավիճակում և նորից ստել․ դու կարող ես դա անել բավականին արագ և հեշտությամբ։ Ո՞րն է այստեղ խնդիրը։ Մի՞թե սա այն պատճառով չէ, որ քո հասակը չափազանց ցածր է։ Դեռ ճշմարտապես ազնիվ չես դարձել։ Դու չափազանց հմուտ ես սոփեստության և ստեր հորինելու մեջ։ Սա լուծելու համար պահանջվում է հետագայում փորձառաբար ապրել Աստծու դատաստանն ու պատիժը և ձգտել ճշմարտությանը՝ ինքդ քեզ ճանաչելու համար։ Հետևաբար, պարզապես քո բերանից ստերը մաքրելու համար չես կարող հաջողության հասնել՝ առանց յոթ կամ ութ տարվա փորձառության միջով անցնելու։ Բացի այդ, որքա՞ն ժամանակ է պետք, որ մարդը փորձառաբար ապրի բաները, մինչ կկարողանա սկզբունքներով գործել իր պարտավորության մեջ։ Միայն զգացմունքներից հրաժարվելը պահանջում է երեքից հինգ տարվա փորձառություն։ Եթե նույնիսկ չես կարողանում հրաժարվել զգացմունքներից, ապա քո խոսքերը, թե սկսել ես գործել սկզբունքներով, դատարկ խոսակցություն է։ Քո խոսքերն ու գործերը անկասկած կկաշկանդվեն զգացմունքներով, դու ի վիճակի չես լինի արդարացիորեն խոսելու և գուցե նույնիսկ խոսես հանուն Սատանայի։ Այդժամ քո խոսքերը նենգափոխված կլինեն, և դու կստես ու կզբաղվես խաբեությամբ։ Հետևաբար, եթե մարդիկ չեն հրաժարվումզգացմունքներից, նրանք չեն կարող գործել սկզբունքների համաձայն։ Ուստի, քանի՞ անգամ պետք է մարդն էտվի, որպեսզի հրաժարվի զգացմունքներից։ Քանի՞ անգամ պետք է մարդը ձախողվի և սայթաքի։ Մարդ պետք է անցնի առնվազն երեքից հինգ տարվա ձախողելու, սայթաքելու և էտվելու միջով, մինչ կկարողանա իր խոսքերում ու գործերում չկաշկանդվել զգացմունքներով։ Կա նաև ներդաշնակ համագործակցություն, որին չես կարող հասնել առանց երեքից հինգ տարվա փորձառության։ Քանի՞ խնդիր պետք է լուծվի՝ ուրիշների հետ ներդաշնակորեն համագործակցելու համար։ Մի՞թե մարդկանց ամբարտավանությունը, ինքնարդարությունը, եսասիրությունն ու ստորությունը չպետք է լուծվեն։ Դու չես կարող լուծել այս ապականված խառնվածքները՝ առանց երեքից հինգ տարվա փորձառության միջով անցնելու, և ուստի չես կարող հասնել ուրիշների հետ ներդաշնակ համագործակցության։ Կա նաև Աստծուն հնազանդվելու ճշմարտությունը։ Քանի՞ տարվա փորձառության միջով պետք է անցնես, մինչ կկարողանաս սա կիրարկել։ Նույնիսկ եթե խոսենք մարդու հանդեպ Աստծու նվազագույն պահանջի մասին, այն է՝ արարածը պետք է պարզապես կատարի իր պարտավորությունը, միևնույն է՝ գուցե նույնիսկ երեքից հինգ տարվա փորձառությունից հետո էլ չկարողանաս լիակատար հնազանդության հասնել։ Ուստի, եթե ցանկանում ես հասնել ճշմարիտ և բացարձակ հնազանդության, այն աստիճանի, որ կարողանաս հնազանդվել՝ անկախ նրանից, թե ինչ կպատահի, անկախ նրանից՝ դա համընկնում է քո պատկերացումներին, թե ոչ, ապա չես կարող հասնել դրան՝ առանց յոթից ութ տարվա կամ նույնիսկ մեկ տասնամյակի փորձությունների, զտման և էտման միջով անցնելու։ Ասացե՛ք ինձ, կարո՞ղ է արդյոք մարդը մտնել այս ճշմարտությունների մեջ՝ հավատալով Աստծուն իր ազատ ժամանակ և միայն հավաքույթների մասնակցելով։ Եթե միայն հավաքույթների ես այցելում և ընդհանրապես ոչ մի պարտավորություն չես կատարում, կարո՞ղ ես հրաժարվել քո ապականված խառնվածքներից և հասնել կյանքի խառնվածքի փոփոխության։ Եթե ջանասիրաբար չես ձգտում ճշմարտությանը, շատ քիչ բան ձեռք կբերես, նույնիսկ եթե յոթ կամ ութ տարի կատարես քո պարտավորությունը, շատ ճշմարտություն ձեռք չես բերի, էլ չասած նրանց մասին, ովքեր ընդհանրապես պարտավորություն չեն կատարում։ Եթե պարտավորություն չես կատարում և, այնուամենայնիվ, ուզում ես մտնել այս ճշմարտությունների մեջ, ապա երազու՛մ ես։ Ասացե՛ք ինձ, առանց այս ճշմարտությունների մեջ մտնելու, մարդիկ կարո՞ղ են ապրել բնականոն մարդկայնությամբ։ (Ո՛չ։) Եթե չես մտել այս ճշմարտությունների մեջ, նախ՝ չես կարողանա դառնալ ազնիվ մարդ։ Քո խոսքը հաճախ կարող է խառնված լինել ստերով և պարունակել քողարկման ու խաբեության բառեր։ Քո խոսքը չափանիշին չի համապատասխանի։ Երկրորդ՝ դու ի վիճակի չես լինի գործելու սկզբունքների համաձայն։ Քո խոսքերն ու գործերը միշտ հիմնված կլինեն անձնական զգացմունքների վրա՝ ընդհանրապես զուրկ լինելով որևէ սկզբունքից։ Երրորդ՝ դու ի վիճակի չես լինի ներդաշնակորեն համագործակցելու ուրիշների հետ։ Ուրիշների հետ ներդաշնակորեն լեզու գտնելու ոչ մի միջոց չես ունենա։ Չորրորդ՝ ի վիճակի չես լինի ճշմարտապես հնազանդվելու Աստծուն։ Աստված կոչ է անում մարդուն կատարել այն պարտավորություն, որն արարածը պետք է կատարի։ Եթե նույնիսկ չես հնազանդվում և չես կատարում քո պարտավորությունը, ապա անարժան կլինես արարած կոչվելու և չես ունենա խիղճ, ողջամտություն կամ բնականոն մարդկայնություն։ Հետևաբար, ճշմարտության իրականության մեջ մտնելու և այն ամենն ապրելու համար, ինչ բնորոշ է բնականոն մարդկայնությանը, մարդը չի կարող արդյունքների հասնել՝ առանց յոթ կամ ութ տարի Աստծու գործը փորձառաբար ապրելու։ Սա չի նշանակում, թե հաստատապես չես կարող փրկվել, եթե հավատացել ես մեկ կամ երկու տարի, բայց այդ փուլում քո հասակը միանշանակ շատ փոքր է, և դեռ շատ հեռու ես Աստծու պահանջներից։ ՀԻմա․ անկախ նրանից՝ հավատացել ես երեքից հինգ տարի, յոթից ութ տարի, թե նույնիսկ տասից քսան տարի, համարձակվո՞ւմ ես ասել, որ ճշմարտություն ես ձեռք բերել։ (Ո՛չ։) Ո՞րն է նվազագույն ապացույցն այն բանի, որ մարդը ճշմարտություն է ձեռք բերել։ Դու պետք է ի վիճակի լինես ստանձնելու Աստծու հանձնարարությունը։ Եթե քեզ վստահվում է եկեղեցու առաջնորդողի աշխատանքը, և կարողանում ես ստանձնել այն, եթե քեզ վստահվում է տարածաշրջանի որոշումներ կայացնող խմբի աշխատանքը, և կարողանում ես ստանձնել այն, և եթե քեզ վստահվում է հովվական տարածքի որոշումներ կայացնող խմբի աշխատանքը, և կարողանում ես ստանձնել այն, ապա միայն սա ցույց է տալիս, որ ունես ճշմարտության իրականություն։ Այդժամ տեղին կլիներ ասել, որ կարող ես հնազանդվել Աստծուն, ունես բնականոն մարդկայնություն, ազնիվ ես և կարող ես ներդաշնակորեն համագործակցել ուրիշների հետ։ Դու կունենայիր այս ողջ ճշմարտության իրականությունները։ Եթե չես կարողանում ստանձնել քեզ վստահված որևէ աշխատանք, ուրեմն ընդհանրապես ճշմարտության իրականություն չունես։ Կարո՞ղ է արդյոք ճշմարտության իրականություն չունեցող մարդը ստանձնել եկեղեցու աշխատանքը։ Կարո՞ղ է արդյոք նա առաջնորդել Աստծու ընտրյալ մարդկանց՝ հասկանալու ճշմարտությունը։ Կարո՞ղ է նա առաջնորդել Աստծու ընտրյալ մարդկանց՝ հնազանդվելու Աստծու ներդաշնակեցումներին և կարգավորումներին։ Կարո՞ղ է նա առաջնորդել Աստծու ընտրյալ մարդկանց՝ կատարելու ավետարանը տարածելու աշխատանքը և Աստծու առաջ բերելու իր պատասխանատվության տակ գտնվող տարածքում Աստծու կողմից նախասահմանված և ընտրված բոլոր մարդկանց։ Կարո՞ղ ես ստանձնել այս ողջ աշխատանքը։ Եթե կարողանաս ստանձնել և ավարտին հասցնել այս ողջ աշխատանքը, ապա այն պնդումը, թե ունես ճշմարտության իրականություն, հիմնավոր կլինի, և Սատանան ասելու ոչինչ չի ունենա ու այդպիսով ամոթահար կլինի։ Եթե չես կարողանում ստանձնել որևէ աշխատանք, ապա ճշմարտության իրականություն չունես։ Ի՞նչն է օգտագործվում ապացուցելու, որ մարդն ունի ճշմարտության իրականություն։ Սա ապացուցվում է նրա աշխատանքի արդյունքներով։ Այն, թե որքան աշխատանք կարող է կատարել մարդը, ապացուցում է, թե որքան ճշմարտության իրականություն նա ունի, և այն, թե որքան աշխատանք կարող է կատարել մարդը, ապացուցում է, թե որքան մեծ է նրա հասակը։ Եթե եկեղեցում կարողանաս լավ առաջնորդել երեսունից հիսուն մարդու, այնպես որ քո եղբայրներն ու քույրերը բոլորն ունենան կյանքի մուտք, սա կապացուցի, որ ունես որոշակի ճշմարտության իրականություն և հասակ։ Եթե կարողանաս առաջնորդել շրջանի մարդկանց և բավականին լավ կատարել աշխատանքը բոլոր առումներով, ապա սա կապացուցի, որ ունես որոշակի ճշմարտության իրականություն և որոշակի հասակ։ Եթե կարողանաս շատ լավ կատարել տարածաշրջանի կամ հովվական տարածքի աշխատանքը, ապա տպավորիչ ես։ Այս դեպքում, և՛ անվամբ, և՛ էությամբ դու հաստատապես ունես ճշմարտության իրականություն և տաճարի սյուն ես։ Ասացե՛ք ինձ, արդյո՞ք մարդու՝ աշխատանք կատարելու կարողության փաստն օգտագործելը լավ մեթոդ է ապացուցելու, որ նա ունի ճշմարտության իրականություն։ (Այո՛։) Ճշմարտության իրականություն ունենալը պարզապես խոսակցություն չէ, և դու պետք է ի վիճակի լինես ստանձնելու աշխատանքը՝ ապացուցելու համար, որ ունես ճշմարտության իրականություն։ Եթե զգում ես, որ ունես հասակ և ճշմարտության իրականություն, և երաշխավորում ես, որ կարող ես լավ կատարել աշխատանքը, եթե առաջխաղացում ստանաս, ապա կարող ես կամավոր առաջադրվել, և Աստծու տունը քեզ կրթվելու հնարավորություն կտա։ Եթե չես կարողանում ստանձնել որևէ աշխատանք և ամեն ինչ տակնուվրա ես անում, ապա քո պնդումը, թե ունես ճշմարտության իրականություն, ճշգրիտ չէ և լոկ խոսակցություն է։ Եթե իսկապես ունես ճշմարտության իրականություն, ինչպե՞ս է պատահում, որ չես կարողանում ստանձնել աշխատանքը։ Կարծում ես, որ եկեղեցու աշխատանքը ստանձնելն այնքան հե՞շտ է, որքան մարդիկ պատկերացնում են։ Գիտե՞ս արդյոք, թե որքան խոսքեր պետք է ասվեն և քանի հավաքույթ պետք է անցկացվի, որպեսզի եկեղեցու տարբեր առաջադրանքները լավ կատարվեն։ Քանի՞ անգամ պետք է առաջնորդողներն ու աշխատողներն էտվեն։ Քանի՞ մարդ պետք է ընտրվի կամ ազատվի աշխատանքից՝ լավ արդյունքների հասնելու համար։ Փորձառաբար ապրե՞լ ես արդյոք դրա հետ կապված գործընթացը։ Այս տարիների ընթացքում ո՞վ գիտի, թե քանի անգամ են չինական եկեղեցիների առաջնորդողներն ու աշխատողներն ազատվել և հեռացվել, և քանի անգամ են վերընտրություններ անցկացվել։ Այնքան շատ առաջնորդներ և աշխատողներ են աշխատանքից ազատվել և հեռացվել։ Հետևաբար, մարդը չի կարող ստանձնել աշխատանքը միայն այն պատճառով, որ ընտրվել է որպես առաջնորդող կամ աշխատող։ Եթե նրանք չունեն նվիրում իրենց պարտականության հանդեպ և շատ ճշմարտության իրականություն չունեն, ապա երկար չեն դիմանա, նույնիսկ եթե ընտրված են, և վաղ թե ուշ նրանք այլ աշխատանքի կփոխադրվեն կամ կազատվեն։ Տարբեր երկրների եկեղեցիներում կան բավականին շատ մարդիկ, ովքեր ձգտում են ճշմարտությանը։ Կարծես թե նրանք ունեն որոշակի ճշմարտության իրականություն և կարող են որոշակի աշխատանք կատարել։ Սակայն դեռ կան ոմանք, ովքեր միշտ ապրում են բացասական վիճակում, նվիրում չունեն իրենց պարտականության հանդեպ և անպատասխանատու են։ Եթե նման մարդիկ չզղջան, նրանք պետք է հեռացվեն։ Եթե առժամանակ հարմար թեկնածուներ չեն գտնվում, ստիպված պետք է բավարարվել նրանցով, բայց հենց որ հարմար թեկնածուներ գտնվեն, նրանք պետք է անմիջապես հեռացվեն աշխատանքից։ Սա օգտակար է աշխատանքին։

Դուք պետք է իմանաք, որ հաղթողների խումբը, որն ի հայտ կգա տարբեր երկրներում Աստծու ընտրյալ մարդկանց միջից, բոլորը ի վիճակի կլինեն ստանձնելու աշխատանքը։ Նրանք բոլորը կլինեն Քրիստոսի լավ զինվորները և տաճարի սյուները։ Իհարկե, երբ այս մարդիկ նոր սկսեն աշխատել, նրանք կարող են դժվարությունների բախվել, որոնք չեն իմանա ինչպես լուծել, քանի որ չունեն ճշմարտության իրականություն, և նրանց պարտավորության արդյունքները գուցե շատ լավ չլինեն։ Այնուամենայնիվ, նրանք միշտ ուտում և խմում են Աստծու խոսքերը, լսում են քարոզներ և կարդում են Աստծու տան աշխատանքային կարգավորումները՝ դրանցից գտնելով որոշ սկզբունքներ և ուղիներ, և աստիճանաբար նրանք արդյունքների են հասնում։ Որքան ավելի շատ ճշմարտություններ են նրանք հասկանում և որքան ավելի շատ սկզբունքներ են ըմբռնում, այնքան ավելի են լավանում նրանց ձեռք բերած արդյունքները։ Ոչ ոք չի կարող աշխատանքը բացառիկ լավ կատարել հենց սկզբից, և ճշմարտությունը քայլ առ քայլ հասկանալով ու սկզբունքները քայլ առ քայլ ըմբռնելով է, որ աշխատանքի արդյունքներն ի վերջո դառնում են ավելի ու ավելի լավը։ Սա բնականոն օրինաչափություն է։ Սա այն գործընթացն է, որի միջով անցնում են ճշմարտությանը ձգտողներն իրենց պարտականության մեջ։ Այնուամենայնիվ, եթե ինչ-որ մեկը ճիշտ մարդ չէ և չի ձգտում ճշմարտությանը, ապա որքան էլ երկար աշխատի, նրա աշխատանքի արդյունքները չեն բարելավվի, և նա պետք է հեռացվի։ Դա նման է որոշ մարդկանց, ովքեր չեն ձգտում ճշմարտությանը և մշտապես ձգտում են կարգավիճակի այն բանից հետո, երբ դառնում են առաջնորդներ կամ աշխատողներ։ Եթե որևէ մեկը գերազանցում է նրանց, նրանք ուզում են ճնշել նրան։ Նրանք ուզում են աչքի ընկնել, իշխանություն ունենալ և վերջին խոսքն ասել։ Այսպիսին է չար մարդու մտածելակերպը։ Երբ լավ մարդը տեսնում է իրենից ավելի լավ մեկին, նա պատրաստակամ է ներդաշնակորեն համագործակցել նրա հետ։ Նա պատրաստակամ է թույլ տալ, որ բոլոր լավ մարդիկ բարձրանան՝ աշխատանք կատարելու, և թույլ տալ, որ հավատ, աշխատանքային ընդունակություն և լավ արժանիք ունեցողները բարձրանան՝ առաջնորդողներ և աշխատողներ լինելու։ Լավ մարդու մտածելակերպն այսպիսին է. «Այն փաստը, որ դու ինձնից լավն ես, լավ բան է։ Ես ողջունում և հավանություն եմ տալիս ցանկացածին, ով ինձնից լավն է։ Ես աջակցում և հավանություն եմ տալիս, որ լավ արժանիք և աշխատանքային ընդունակություն ունեցող ցանկացած մարդ լինի առաջնորդող»։ Նույնիսկ եթե նրանք կարգավիճակով ինձնից բարձր լինեն, ես չեմ նախանձի»։ Միայն սա բնականոն մարդկայնություն ունեցող մարդու մտածելակերպն է։ Որոշ մարդիկ չունեն այս մտածելակերպը։ Երբ նրանք տեսնում են իրենցից ավելի լավին կամ ավելի բարձր կարգավիճակ ունեցողին, նրանք միշտ դիմադրում են և նրանց մեջքի հետևում հարցնում են իրենք իրենց. «Ինչպե՞ս կարող եմ քեզ անհարմար դրության մեջ գցել։ Ի՞նչ կարող եմ օգտագործել՝ քեզ համար դժվարություններ ստեղծելու և քեզ հիմարի պես ներկայացնելու համար»։ Նրանք միշտ ուզում են տեսնել, թե ինչպես են ուրիշներն իրենց հիմար դրության մեջ դնում։ Մի՞թե նրանք դևեր չեն։ (Դևեր են։) Նրանք դևեր ու սատանաներ են։ Այն, ինչ նրանք բացահայտում են, Սատանայի խառնվածքն է։ Եթե ճշմարտապես ունես այս տեսակի խառնվածք քո ներսում և չես լուծում այն, այլ միշտ ապրում ես քո ապականված խառնվածքով, Աստված կզզվի քեզնից, և վաղ թե ուշ կհեռացվես։ Հետևաբար, պետք է աղոթես. «Ո՜վ Աստված, ես հայտնաբերել եմ, որ չարամիտ սիրտ ունեմ։ Ինչո՞ւ եմ նախանձում, երբ տեսնում եմ ինձնից ավելի լավին, և ինչո՞ւ եմ միշտ ուզում տեսնել, թե ինչպես են նրանք իրենց հիմար դրության մեջ դնում։ Ինչո՞ւ եմ ցանկանում, որ նրանք հեռացվեն։ Ես չեմ համագործակցում նրանց հետ իրենց կատարած ոչ մի աշխատանքում, և փոխարենը՝ վնասում եմ նրանց և հետ եմ պահում՝ ցանկանալով, որ նրանք հիմար թվան։ Մի՞թե ես դև չեմ։ Ո՜վ Աստված, թող որ Դու անիծես ինձ, խրատես ինձ և պատժես ինձ։ Ես պատրաստակամ եմ ընդունել ճշմարտությունը, ապաշխարել և փոխվել»։ Եթե մի քանի անգամ այսպես աղոթես, և Աստված տեսնի, որ ճշմարտապես զղջում ես և պատրաստակամ ես ապաշխարելու, ապա Աստված կլուսավորի քեզ՝ հասկանալու ճշմարտությունը։ Սրանից հետո քո մտածելակերպը մի փոքր կբարելավվի. այն այլևս դևի մտածելակերպ չի լինի, այլ աստիճանաբար կդառնա խիղճ և ողջամտություն ունեցող բնականոն մարդկայնության մտածելակերպ։ Այդժամ, երբ նորից տեսնես, որ ուրիշները լավ են գործում, կասես. «Ես ուրախ եմ և հավանություն եմ տալիս, երբ ուրիշները լավ են գործում։ Երբ ուրիշները լավ չեն գործում և վշտացած են դժվարություններից, ես նույնպես վշտացած եմ։ Նրանց վիշտն իմ վիշտն է, և նրանց դժվարություններն իմ դժվարություններն են։ Ես կարեկցում եմ նրանց»։ Մարդկանց այսպես վերաբերվելը բնականոն մարդկայնություն ունենալն է, և խիղճ ու ողջամտություն ունեցող մարդիկ բոլորը կարող են այսպես վերաբերվել ուրիշներին։ Նայե՛ք տարբեր երկրներում եկեղեցական կյանքի մասին զեկույցներին. որոշ եղբայրներ և քույրեր ողջունում և գրկում են ուրիշներին, երբ տեսնում են, որ նրանք վկայություն են կրում Աստծու համար։ Սա ճշմարիտ փոխադարձ սեր է։ Սրանք բնականոն մարդկայնություն, խիղճ և ողջամտություն ունեցող մարդիկ են։ Եթե նման մարդն ունի առաջնորդող կամ աշխատող լինելու որակ, նա կարող է լինել առաջնորդող կամ աշխատող։ Նրանց մարդկայնությունը բնականոն է, ուստի նրանք կարող են լավ կատարել աշխատանքը։ Հետևաբար, առաջնորդող կամ աշխատող լինելու համար մարդ նախ պետք է լուծի իր ներսի ապականված խառնվածքները՝ որպեսզի ազատվեի նախանձից, կարողանա ճիշտ և արդարացիորեն վերաբերվել բոլորին և կարողանա ներդաշնակորեն համագործակցել եղբայրների և քույրերի հետ։ Մի՞թե սա այն չէ, ինչի մեջ մարդ նախ պետք է մտնի։ (Այդպես է։) Ապա ի՞նչն է կաշկանդում մարդկանց, որպեսզի նրանք կարողանան ներդաշնակորեն համագործակցել ուրիշների հետ իրենց աշխատանքում։ Ո՞ր գործելակերպերն են առավելապես խանգարում մարդկանց ներդաշնակորեն համագործակցել ուրիշների հետ և մեկ սրտով ու մտքով կատարել իրենց պարտականությունը։ Բացահայտե՛ք այս գործելակերպերը և վերլուծեք, թե ինչ խառնվածքներ, մտքեր և տեսակետներ են ղեկավարում դրանք։ Այս խառնվածքները, մտքերն ու տեսակետները վնասում և կործանում են մարդկանց, և դրանք նրանց մահը կլինեն։ Եթե այս բաները չլուծվեն, ապա մարդիկ չեն կարող հասնել ուրիշների հետ ներդաշնակ համագործակցության՝ իրենց պարտավորությունը լավ կատարելու համար։ Օրինակ՝ ուրիշներին նախանձելը մարդու ապականվածության դրսևորման կողմերից մեկն է։ Եթե հայտնաբերես մի եղբոր կամ քրոջ, ով քեզնից ավելի լավ որակ ունի, ով Աստծու խոսքերը կարդալուց հետո հասնում է մաքուր և լուսավորված ըմբռնման, և ով հաստատապես քեզնից ավելի լավը կլիներ, եթե լիներ առաջնորդող կամ աշխատող, ինչպե՞ս պետք է վերաբերվես նրան։ Պե՞տք է արդյոք երաշխավորես նրան։ (Այո՛։) Եթե լավ մարդ ենք հայտնաբերում, պետք է երաշխավորենք և մշակենք նրան։ Մենք երբեք չպետք է նախանձենք արժանավորներին և ունակներին, ոչ էլ պետք է ճնշենք կամ բացառենք տաղանդավոր մարդկանց։ Եկեղեցու աշխատանքը լավ կատարելու համար առաջնորդներն ու աշխատողները պետք է արդարացիորեն և անկողմնակալ վերաբերվեն մարդկանց։ Եթե նրանք հայտնաբերում են լավ որա ունեցող մեկին, պետք է արագորեն առաջ քաշեն և օգտագործեն նրան։ Եթե նրանք հայտնաբերում են մեկին, ով իր պարտավորությունը չափանիշին համապատասխան չի կատարում, կամ մեկին, ով ճիշտ մարդ չէ, ապա պետք է արագորեն հեռացնեն նրան։ Այս կերպ եկեղեցու աշխատանքը կդառնա ավելի ու ավելի հեշտ։ Հասկանո՞ւմ եք։ (Այո՛։) Եթե հայտնաբերես մեկին, ով լավ որակ և ըմբռնման ընդունակություն ունի, և ում մարդկայնությունը առանձնակի ուղղամիտ է, բայց ով չափազանց կարճ ժամանակ է հավատացել Աստծուն և դեռ չի կարող ստանձնել աշխատանքը, ապա պետք է սկսես նրան մշակելուց։ Մեկ կամ երկու տարի անց, երբ նա ձեռք բերի որոշակի փորձառություն, կարող է առաջ քաշվել և օգտագործվել։ Երբ նա նոր է սկսել հավատալ Աստծուն և ոչինչ չի հասկանում, նույնիսկ եթե լավ որակ և ըմբռնման ընդունակություն ունի, նա չի կարող առաջ քաշվել կամ օգտագործվել։ նա պետք է առնվազն մեկ տարի հավատացած լինի Աստծուն և պետք է ունենա որոշակի փորձառություն։ Այնուհետև նա նախ կարող է նշանակվել եկեղեցու առաջնորդող կամ սարկավագ և քայլ առ քայլ մշակվել ու կրթվել։ Որոշ ժամանակ աշխատելուց հետո, երբ նրա բերած արդյունքները բավականին լավ տեսք ունենան, նա կարող է առաջխաղացվել շրջանի որոշումներ կայացնող խումբ։ Եթե նա կարողանա ինքնուրույն գլուխ հանել շրջանի որոշումներ կայացնող խմբի աշխատանքից, ապա կարող է առաջ քաշվել որոշումներ կայացնող խմբի առաջնորդի պաշտոնում։ Եվս մի քանի տարի Աստծուն հավատալուց և որոշակի հասակ ունենալուց հետո, նա կարող է գնալ տարածաշրջանային կամ հովվական տարածքի որոշումներ կայացնող խումբ։ Այս կերպ նրան քայլ առ քայլ մշակելով և կրթելով ՝ նա ի վիճակի կդառնա ստանձնելու աշխատանքը։ Կարճ ասած, լինի դա եկեղեցում, թե շրջանում, եթե մի լավ մարդ ձգտում է ճշմարտությանը և կարող է գործը ստանձնել, ծառայում է որպես առաջնորդ, ապա այդ եկեղեցու կամ շրջանի աշխատանքը կարող է լավ կատարվել, և այս լավ մարդը կարող է ստանձնել աշխատանքը։ Ուրեմն ասացե՛ք ինձ, մի՞թե մարդիկ ավելի շատ ճշմարտություն չէին շահի՝ հավատալով Աստծուն նման եկեղեցում կամ շրջանում։ (Այո՛։) Ուրմեն ո՞ւմ պետք է շնորհակալ լինեն այս եկեղեցու կամ շրջանի եղբայրներն ու քույրերն այսքան շատ ճշմարտություն ձեռք բերելու համար։ Նրանք պետք է շնորհակալ լինեն ճշմարտությանը ձգտող այս մարդուն, լավ որակ ունեցող այս մարդուն, ով բարձրացվել է Աստծու կողմից։ Երբ նման մարդն ամեն օր հաղորդակցվում է քեզ հետ ճշմարտության մասին, դու շատ բան ձեռք կբերես քո պարտավորության մեջ, ուղի կունենաս ճշմարտությանը ձգտելու հարցում և սկզբունքներ կունենաս ճշմարտությունը կիրարկելիս։ Որքան շատ աշխատես, այնքան ավելի պայծառ կլինի քո սիրտը, և այնքան ավելի պայծառ կլինի այն ճանապարհը, որով քայլում ես։ Մի՞թե այսպես չէ։ (Այդպես է։)

Մարդկանց ազնվորեն և արդարացիորեն վերաբերվելուց բացի, մեկ այլ սկզբունք, որին առաջնորդներն ու աշխատողները պետք է հետևեն իրենց աշխատանքում, դա իմանալն է, թե ինչպես մշակել մարդկանց։ Մարդկանց մշակելու համար պետք է ճիշտ մարդ ընտրես։ Եթե նա ճիշտ մարդ է, ճշմարտությանը ձգտող մարդ, ապա նրան մեկ տարի մշակելը կտա մեկ տարվա արդյունքներ, երկու տարի մշակելը կտա երկու տարվա արդյունքներ, իսկ երեք տարի մշակելուց հետո նա կկարողանա ինքնուրույն աշխատել։ Սա կնշանակի, որ ճիշտ մարդ է ընտրվել։ Եթե հինգ տարի մշակել ես մեկին, և նա դեռ չի կարողանում ինքնուրույն աշխատել, ո՞րն է խնդիրը։ Սա ցույց է տալիս, որ այս մարդու որակը թույլ է։ Նման մարդը կարող է ստանձնել աշխատանքի միայն մեկ մասը, և չի կարող կառավարել համապարփակ աշխատանք։ Նա չունի այդ որակը կամ աշխատանքային ընդունակությունը։ Այս դեպքում սխալ մարդ ես ընտրել և ուշացրել ես եկեղեցու աշխատանքը։ Հետևաբար, մշակելու համար կենսական է ճիշտ մարդ ընտրելը՝։ Որոշ մարդիկ ասում են. «Ինձ չի հետաքրքրում՝ ընտրված մարդը ճիշտ է, թե ոչ, կամ ինչպիսին է նրա որակը, ես պարզապես սիրով կվերաբերվեմ նրան։ Անկախ նրանից՝ ստիպված կլինեմ աջակցել նրան երեք, հինգ, թե նույնիսկ տասը տարի, ես կհամառեմ մինչև վերջ»։ Ճի՞շտ է արդյոք սա ասելը։ (Ո՛չ։) Սա նման է հավին արծվի պես բարձր թռչել սովորեցնելուն։ Կարելի՞ է արդյոք հասնել դրան։ (Ո՛չ։) Ինչո՞ւ ոչ։ Երկուսն էլ թևեր ունեն, այնպես չէ՞։ Քանի որ հավը չունի արծվի որակը կամ բնածին հատկանիշները, որքան էլ բարձր թռչի, նա երբեք արծվի պես բարձր չի թռչի։ Եթե ինչ-որ մեկն ունի թույլ որակ, և դու համառորեն փորձում ես մշակել նրան, որպեսզի դառնա առաջնորդող կամ աշխատող, կարո՞ղ է արդյոք նրան կրթելը արդյունք տալ։ (Ո՛չ։) Եթե նրա որակը թույլ է, նրան մշակելն անօգուտ է։ Մարդկանց մշակելիս պետք է ընտրես որակ ունեցող մարդկանց։ Նույնիսկ եթե լավ որակ ունեցող մարդն այժմ շատ ճշմարտություն չի հասկանում և չգիտի՝ ինչպես կատարել աշխատանքը, որոշ ժամանակ նրան մշակելուց և կրթելուց հետո նա կիմանա՝ ինչպես կատարել աշխատանքը։ Նման մարդ մշակելը արծիվ վարժեցնելու նման է։ Արծիվը կարող է երկինք ճախրել մեկ տարուց ավելի քիչ ժամանակում, մինչդեռ հավը չի ճախրի, նույնիսկ եթե տասը տարի վարժեցվի։ Հետևաբար, մարդկանց մշակելու համար նախ պետք է նայես նրանց որակին։ Պետք է նայես, թե արդյոք նրանք ունեն ըմբռնման ընդունակություն, աշխատանքային ունակություն և խորաթափանցություն։ Պետք է նայես այս բոլոր կողմերին։ Որոշ մարդիկ զուրկ են աշխատանքային ունակություններից։ Երբ նրանք բախվում են մի իրավիճակի, որտեղ շատ մարդիկ և շատ աշխատանք կա, նրանք չգիտեն՝ ինչպես կազմակերպել աշխատանքը։ Այդքան շատ մարդկանց հետ նրանք շփոթվում են, թե ով որ աշխատանքի համար է հարմար, և ով որ պարտավորության, և չեն կարողանում կազմակերպել այն։ Որքան շատ են բան կա, այնքան ավելի շատ են նրանք շփոթվում և այնքան ավելի քիչ գիտեն՝ ինչ անել։ Կարո՞ղ է արդյոք նման մարդը կատարել աշխատանքը։ (Ո՛չ։) Որոշ մարդիկ այնքան են անհանգստանում, որ լաց են լինում, երբ շատ բան կա, և չեն կարողանումկազմակերպել։ Սա անբավարար որակ ունենալն է։ Կարո՞ղ է արդյոք անբավարար որակ ունեցող մարդն ավելի մեծ որակ ձեռք բերել՝ Աստծուց այն խնդրելով։ Օրինակ՝ նրանք աղոթում են. «Ո՜վ Աստված, աշխատանքն այնքան բարդ է, և այնքան շատ մարդիկ կան։ Ես չգիտեմ՝ ինչպես կազմակերպել այս ամենը։ Խնդրում եմ, տուր ինձ ավելի մեծ որակ, որպեսզի կարողանամ կազմակերպել այս աշխատանքը»։ Արդյո՞ք նման աղոթքն արդյունավետ է։ Որոշ մարդիկ ասում են. «Այսպես աղոթելը հավատ է ցույց տալիս։ Հավատով աշխատանքն աստիճանաբար կարող է կատարվել։ Շտապելու կարիք չկա»։ Ճի՞շտ է արդյոք սա ասելը։ (Ո՛չ։) Ուրեմն սխա՞լ է նման մեծ հավատ ունենալը։ (Նրանք չգիտեն, թե ինչի համար պետք է աղոթել, և ինչն է կանխորոշված Աստծու կողմից և չեն կարող փոխվել։) Ճիշտ է։ Այս բոլոր բաները կանխորոշված են Աստծու կողմից։ Մարդիկ ծնվում են այնպիսին, ինչպիսին կան։ Մարդիկ կարող են ձեռք բերել ճշմարտությունը՝ կատարելով իրենց պարտավորությունը և աստիճանաբար փորձառաբար ապրելով Աստծու խոսքերը, բայց մարդու որակը կանխորոշված է Աստծու կողմից, և ոչ ոք չի կարող փոխել այն։ Աստծու կողմից կանխորոշված բաների վերաբերյալ մարդիկ պետք է սովորեն փնտրել Աստծու մտադրությունները և հնազանդվել։ Օրինակ՝ եթե քո ծնողները չեն հավատում Աստծուն և փորձում են խոչընդոտել քո հավատին, և դու աղոթում ես. «Ո՜վ Աստված, ծնողներս խոչընդոտում են Քեզ հավատալուն և իմ պարտավորությունը կատարելուն։ Խնդրում եմ, ազատիր ինձ այս իրավիճակից», արդյո՞ք նման աղոթքը լավն է։ (Ո՛չ։ Մենք պետք է հնազանդվենք Աստծու կարգավորումներին և ներդաշնակեցումներին, և փնտրենք ճշմարտությունն ու դասեր քաղենք այս իրավիճակում։) Սա Աստծու կողմից կանխորոշված իրավիճակ է, և Աստծու մտադրությունն է, որ դու սովորես դրանից։ Եթե խնդրես Աստծուն ազատել քեզ այս իրավիճակից, որը Նա կանխորոշել է քեզ համար, մի՞թե դա Աստծու դեմ ըմբոստանալ չէ։ (Այդպես է։) Եթե կարողանաս սովորել այս իրավիճակից և աղոթել. «ո՜վ Աստված, Քո մտադրությունները թաքնված են ինձ պատահած այս իրավիճակի մեջ։ Ես հնազանդվում եմ Քո ներդաշնակեցումներին և կարգավորումներին։ Իմ ծնողները չեն հավատում Աստծուն և խոչընդոտում են իմ հավատին, բայց ես չեմ կարող լսել նրանց։ Ես պետք է ընտրեմ Քեզ հետևելը», ապա ճիշտ ես աղոթում։ Երբ գա ժամանակը, որ Աստված կարգավորի, որպեսզի կատարես քո պարտավորությունը, գուցե Նա ազատի քեզ այս իրավիճակից։ Սա մի բան չէ, որի համար աղոթել ես, այլ մի բան, որն Աստված կարգավորել է քո հավատի համաձայն։ Երբ աղոթում ես Աստծուն, պետք է ձգտես հասկանալ Աստծու մտադրությունները։ Չես կարող անհիմն կերպով պահանջել, որ Աստված փոխի այն ամենը, ինչ Նա կարգավորել է քեզ համար։ Անօգուտ է աղոթել, որ Աստված փոխի Իր կարգավորած մարդկանց, իրադարձությունները և բաները։ Հետևաբար, եթե մարդիկ չեն կարողանում կատարել աշխատանքը թույլ որակի պատճառով, ապա կարիք չկա նրանց ավելի շատ ժամանակ տալ կրթվելու համար, ոչ էլ կարիք կա սպասել, որ Աստված նրանց ավելի մեծ որակ տա, քանի որ Աստված դա չի անի։ Եթե նրանք չեն կարողանում կատարել աշխատանքը, քանի որ զուրկ են ճշմարտությունից, ապա սա կարելի է շտկել՝ ձգտելով ճշմարտությանը և փորձառաբար ապրելով Աստծու գործը։ Սա այն պատճառով է, որ ճշմարտությունը մարդիկ ձեռք են բերում աստիճանաբար՝ փորձառաբար ապրելով Աստծու գործը. այն Աստծու կողմից չի շնորհվում մարդկանց ի ծնե։ Այնուամենայնիվ, թույլ որակ ունեցողները հարմար չեն առաջնորդի կամ աշխատողի պարտավորությունը կատարելու համար, և նրանց պարտավորությունները պետք է արագորեն կարգավորվեն։ Հասկանո՞ւմ եք սա։ (Այո՛։) Որոշ մարդիկ ասում են. «Եթե մարդիկ աստիճանաբար փորձառաբար ապրեն Աստծու գործը և ձեռք բերեն ճշմարտությունը, մի՞թե նրանց թույլ որակի խնդիրը չի շտկվի։ Մի՞թե նրանք այդժամ չեն կարող կատարել առաջնորդի կամ աշխատողի պարտավորությունը»։ Ճի՞շտ է արդյոք այս պնդումը։ Եթե նրանցից երեքից հինգ տարի է պահանջվում ճշմարտությունը ձեռք բերելու համար, ո՞վ է կատարելու աշխատանքն այս ընթացքում։ Մի՞թե ողջ աշխատանքը չի ուշանա։ Հետևաբար, թույլ որակ ունեցող առաջնորդների և աշխատողների պարտավորությունները պետք է արագորեն կարգավորվեն։ Որոշ մարդիկ բավականին լավ դրսևորեցին իրենց՝ մինչ առաջնորդոներ դառնալը։ Բոլորը տեսան, որ նրանք հավատ ունեն և եռանդուն են իրենց ձգտման մեջ, ուստի ընտրեցին նրանց որպես առաջնորդներ։ Այնուամենայնիվ, որոշ ժամանակ աշխատելուց հետո ես հայտնաբերեցի, որ նրանք թույլ որակ ունեն, որ չեն կարողանում որևէ բան խորությամբ տեսնել, և որ նրանց ըմբռնումը հատկապես խեղաթյուրված է։ Որպես առաջնորդներ նրանց ծառայելն ուշացրեց Աստծու ընտրյալ մարդկանց կյանքի մուտքը, ուստի ես անմիջապես վերանշանակեցի նրանց և հանձնարարեցի կատարել այն պարտավորությունը, որին նրանք հարմար էին։ Կանեի՞ք արդյոք սա, եթե հանդիպեիք նման մարդկանց։ (Մենք պատրաստակամ կլինեինք այսպես կիրարկել։) Եթե վախենում եք վիրավորել կամ ցավեցնել մարդկանց, կամ կաշկանդված եք զգացմունքներով և չեք կարողանում կիրարկել ճշմարտությունը, արդյո՞ք դա կազդի եկեղեցու աշխատանքի և ավետարանի տարածման վրա։ (Կազդի։) Որոշ մարդիկ տեսնում են, թե ինչպես են հակաքրիստոսներն ու չար մարդիկ խռովում եկեղեցին, բայց չեն զբաղվում նրանցով։ Նրանք կաշկանդված են զգացմունքներով և վախենում են վիրավորել նրանց։ Ի վերջո, եկեղեցու աշխատանքն ուշանում է, և Աստծու ընտրյալ մարդիկ վնասվում են։ Կարո՞ղ են արդյոք նրանք կրել այս պատասխանատվությունը։ Սա նման է նրան, որ տեսնես, թե ինչպես է թունավոր օձը պատրաստվում խայթել ինչ-որ մեկին, և դրանից արագ ազատվելու փոխարեն՝ փորձես բանակցել օձի հետ՝ համոզելով նրան չխայթել։ Ճի՞շտ է արդյոք այսպես վարվելը։ (Ո՛չ։) Սա արդյունք չի տա։ Երբ տեսնում ես, որ թունավոր օձը խայթում է ինչ-որ մեկին, պետք է մեկ վճռական հարվածով կտրես նրա գլուխը։ Որոշ մարդիկ ասում են. «Դա այնքան դաժան է։ Մենք պետք է սեր ցուցաբերենք նաև օձի հանդեպ։ Մենք պետք է բանակցենք նրա հետ՝ համոզելով չխայթել»։ Ճի՞շտ է արդյոք սա։ (Ո՛չ, սա կեղծ կարեկցանք է և զուրկ է սկզբունքից։) Օձը վնասում է այդ մարդուն, սակայն դու ողորմություն և սեր ես ցուցաբերում նրա հանդեպ։ Մի՞թե սա դաժան չէ խայթվող մարդու նկատմամբ։ Սա սեր ցուցաբերելու ժամանակը չէ։ Երբ անողոք լինելու ժամանակն է, պետք է անողոք լինես։ Եթե օձն ուզում է վնասել ինչ-որ մեկին, պետք է մեկ վճռական հարվածով կտրես նրա գլուխը։ Հետևաբար, եթե կան չար մարդիկ, ովքեր խռովում են եկեղեցին, պետք է զբաղվես նրանցով։ Եթե կան Սատանաներ, ովքեր մոլորեցնում են Աստծու ընտրյալ մարդկանց, պետք է բացահայտես նրանց։ Մի՛ վախեցիր նրանց վիրավորելուց։ Այնուամենայնիվ, երբ անհրաժեշտ է իմաստություն գործադրել նրանց հետ, պետք է անես դա, բայց պետք է ապահովես, որ Սատանայի ծրագրերը չհաջողվեն, և պետք է պաշտպանես քո եղբայրներին ու քույրերին։ Եկեղեցու աշխատանքը պաշտպանելու համար պետք է արդարության զգացում ունենաս։ Երբ պետք է ընտրություն կատարվի, պետք է կատարես այն, և երբ պետք է միջոցներ ձեռնարկվեն, պետք է ձեռնարկես դրանք։ Եթե առաջնորդներն ու աշխատողները չեն կարողանում հետևել սկզբունքներին, կարո՞ղ են արդյոք համապատասխանել Աստծու մտադրություններին։ (Ո՛չ։) Աստված հավանություն չի տա նման մարդկանց։ Տեսնո՞ւմ ես, տարիների ընթացքում չինական եկեղեցիները գործ են ունեցել անթիվ կեղծ առաջնորդների, կեղծ աշխատողների, անհավատների, չար մարդկանց և հակաքրիստոսների հետ։ Սկսած 2012 թվականից՝ ես հաջորդաբար եկեղեցին մաքրելու աշխատանքային կարգավորումներ եմ հրապարակել մայրցամաքային Չինաստանի եկեղեցիների համար։ Որտեղ էլ կան հակաքրիստոսներ և չար մարդիկ, ովքեր մոլորեցնում են մարդկանց, եթե առաջնորդներն ու աշխատողներն անպատասխանատու են և ժամանակին չեն վտարում կամ հեռացնում նրանց, նրանք բոլորը կազատվեն աշխատանքից որպես կեղծ առաջնորդներ և կեղծ աշխատողներ։ Աշխատանքային կարգավորումները հրապարակվելուց հետո եկեղեցիները սկսեցին իրականացնել դրանք։ Հակաքրիստոսներն ու չար մարդիկ, ովքեր խռովում էին եկեղեցիները, վտարվեցին, իսկ նրանք, ովքեր գողանում էին ընծաները կամ գործում էին որպես Հուդաներ, նույնպես անմիջապես հեռացվեցին։ Անհավատները, ովքեր մի քանի տարի հավատացել էին Աստծուն, բայց չէին կարդում Աստծու խոսքերը, չէին հաղորդակցվում ճշմարտության մասին կամ ընդհանրապես ոչ մի պարտավորություն չէին կատարում, նույնպես բոլորը հեռացվեցին։ Մայրցամաքային Չինաստանի եկեղեցիները տարիների ընթացքում մաքրել են նման մարդկանց, և մարդիկ ալիք առ ալիք հեռացվել է։ Ի հավելումն նրանց, ովքեր հեռացվեցին և վտարվեցին, կային նաև անհավատներ, ովքեր բացահայտվեցին և դուրս թողնվեցին մեծ կարմիր վիշապի իրականացրած ձերբակալությունների և հալածանքների պատճառով։ Նրանցից ոմանք նահանջեցին՝ ձերբակալվելու վախից, իսկ ոմանք, ձերբակալվելուց հետո, ստորագրեցին Երեք հաշվետվությունները կամ գործեցին որպես Հուդաներ և ծախեցին Աստծու տան շահերը։ Այս մարդիկ բացահայտվեցին և դուրս թողնվեցին։ Իրականում, շատերն արտաքուստ բավականին եռանդուն էին թվում նախքան ձերբակալվելը, և կարող էին ճշմարտապես տառապել ու գին վճարել իրենց պարտավորության մեջ։ Ոմանք նույնիսկ առաջնորդներ և աշխատողներ էին։ Բայց ձերբակալվելուց հետո նրանք կառչեցին կյանքից և վախեցան մահից, և ի վիճակի չեղան դիմանալու խոշտանգումներին, ուստի ստորագրեցին Երեք հայտարարությունները և դարձան Հուդաներ։ Միայն մի քանի մարդ, ովքեր հավատարիմ էին Աստծուն, հաստատուն կանգնեցին իրենց վկայության մեջ։ Նրանք հրաժարվեցին դավաճանել Աստծուն նույնիսկ իրենց սեփական կյանքի գնով։ Հետևաբար, երբ Աստծու գործն ավարտվի, միայն քչերը, ովքեր ճշմարտապես հավատում են, հավատարիմ են Աստծուն և ձգտում են ճշմարտությանը, կկարողանան հաստատուն կանգնել։ Մարդկանց մեծ մասը դուրս կթողնվի։ Տարիների ընթացքում բավականին շատ արտասահմանյան չինացիներ նույնպես հեռացվել և վտարվել են։ Նրանք, ովքեր խանգարումներ և անհանգստություններ են բերել իրենց պարտականության մեջ, և ովքեր մշտապես ձևականորեն են գործել և ձրիակերությամբ են զբաղվել, բոլորը հեռացվել կամ վտարվել են։ Այս մարդիկ բոլորն այն մարդիկ էին, ովքեր չէին ընդունում ճշմարտությունը և զզվում էին ճշմարտությունից։ Ուստի Ասացե՛ք ինձ, Աստծուն հավատացող մարդկանց ո՞ր տոկոսն է իսկապես ձգտում ճշմարտությանը։ (Տասը տոկոսը։) Չինական եկեղեցիներում ճշմարտությանը ձգտող մարդկանց համամասնությունն առավելագույնը մեկ երրորդն է։ Այս մեկ երրորդն անկեղծորեն ձգտում է դեպի ճշմարտությունը, մինչդեռ մնացած երկու երրորդը կհեռացվի։ Չինացիների մեջ իսկապես ճշմարտությանը ձգտտողները փոքրամասնություն են կազմում։ Այդ դեպքում Չինաստանից դուրս գտնվող եկեղեցիներում մարդկանց ո՞ր տոկոսն է անկեղծորեն հավատում Աստծուն և ձգտում ճշմարտությանը։ Կարո՞ղ է արդյոք դա լինել երկու երրորդը։ Եթե այդպես է, ապա մնացած մեկ երրորդը պետք է դուրս թողնվի և աստիճանաբար մաքրվի եկեղեցուց։ Արտասահմանյան տարբեր երկրների եկեղեցիները դեռ չեն սկսել մաքրման աշխատանքը։ Երկու կամ երեք տարուց, երբ չար մարդիկ ի հայտ գան՝ խանգարումներ և անհանգստություններ առաջացնելու, կամ երբ հակաքրիստոսներն ու կեղծ քրիստոսներն ի հայտ գան՝ մարդկանց մոլորեցնելու, մաքրումը կարող է սկսվել։ Այս մարդիկ հենց նրանք են, ովքեր պետք է մաքրվեն եկեղեցուց և դուրս թողնվեն։ Կան նաև որոշ չհավատացողներ, ովքեր միայն անվանական հավատացյալներ են, և նրանք նույնպես պետք է հեռացվեն։ Ի՞նչ է անվանական հավատացյալը։ Դա մեկն է, ով Աստծուն գտնելուց հետո պարտավորություն չի կատարում, հաճախ չի մասնակցում հավաքույթներին և խոսում ու գործում է ճիշտ անհավատի պես։ Նման մարդիկ անվանական հավատացյալներ են, և նրանք պետք է դուրս թողնվեն։ Երբ եկեղեցին նոր է հիմնադրվում, և բոլորը նոր են սկսել հավատալ Աստծուն, տարբեր տեսակի մարդիկ դեռ չեն բացահայտվել, ուստի եկեղեցին մաքրման աշխատանք չի կատարում։ Երեքից հինգ տարի Աստծուն հավատալուց և ոմանց բացահայտվելուց հետո մաքրման աշխատանքը պետք է կատարվի։ Որոշ մարդիկ, երբ նոր են սկսում հավատալ Աստծուն, ասում են. «Օ՜, ես չեմ կարող պարտավորություն կատարել։ Ընտանեկան իրավիճակս թույլ չի տա։ Ես ուզում եմ գումար վաստակել, զուգընկեր գտնել և ամուսնանալ»։ Նոր հավատացյալների համար բնականոն է ունենալ այս խնդիրները, բայց եթե նրանք դեռ չեն լուծել այս խնդիրները երեքից հինգ տարի Աստծուն հավատալուց հետո և դեռ ընդհանրապես ոչ մի պարտավորություն չեն կատարում, ապա նրանք վտանգի մեջ են։ Նրանք չեն ընդունում կամ չեն ձգտում ճշմարտությանը։ Նույնիսկ եթե նրանք խանգարումներ և անհանգստություններ են առաջացնում, ապա ժամանակն է, որ նրանք հեռացվեն։ Նրանք, ովքեր չարիք են գործում և անհանգստություններ են բերում, և նրանք, ովքեր տենչում են աշխարհը և ընդհանրապես ոչ մի պարտավորություն չեն կատարում, կբացահայտվեն և դուրս կթողնվեն։ Այս մարդիկ անգիտակցաբար կմահանան աղետների մեջ։ Ինչ վերաբերում է նրանց, ովքեր ձգտում են ճշմարտությանը, նրանք քայլ առ քայլ առաջ կխաղացվեն և կմշակվեն։ Նրանք մշտապես փորձառաբար ապրում են Աստծու գործը, մինչ կատարում են իրենց պարտավորությունը, և աստիճանաբար ձեռք են բերում ճշմարտությունը և կատարյալ են դարձվում։

Տարբեր երկրների եկեղեցիներում որոշ առաջնորդներ և աշխատողներ չեն ընդունում էտումը։ Սա լուրջ խնդիր է։ Գնացե՛ք և նայե՛ք չինական եկեղեցիներին. կա՞ արդյոք որևէ առաջնորդ կամ աշխատող, ով չի ընդունում էտումը։ Տարիներ շարունակ էտվելուց հետո չինացի հավատացյալների մեծ մասը լավ վարքագիծ ունի, և նույնիսկ եթե էտումը սրտաճմլիկ է, նրանք կարող են ընդունել և հնազանդվել ասվածին։ Սա այն պատճառով է, որ նրանք գիտեն, որ էտումն իրենց օգտին է, և որ եթե չընդունեն էտվելը, չեն կարող ձեռք բերել ճշմարտությունը։ Հետևաբար, առաջնորդների և աշխատողների համար ամենահիմնական պահանջներն են՝ կարողանալ ընդունել էտվելը և հնազանդվել ճշմարտությանը. հակառակ դեպքում չես կարող լինել առաջնորդ կամ աշխատող։ Եթե ինչ-որ մեկը բացահայտում է քեզ կամ մատնանշում է քո խնդիրները, և դու ընդդիմանում ես, բարկանում ես, դիմադրություն ես զգում կամ ըմբոստանում ես, ապա դու ամբողջովին զուրկ ես հնազանդությունից։ Նման մարդը ոչնչով չի տարբերվում անհավատից։ Հետևաբար, եթե որևէ առաջնորդ կամ աշխատող լավ չի կատարում իր աշխատանքը, և նրանք նաև չեն ընդունում էտվելը, ապա նրանք հարմար չեն առաջնորդ կամ աշխատող լինելու համար։ Եթե նրանք զղջում են ցուցաբերում, նրանց կարելի է ևս մեկ հնարավորություն տալ։ Այնուամենայնիվ, եթե նրանք չեն գիտակցում իրենց խնդիրները և փոխարենը դատապարտում են ուրիշներին՝ կարծելով, թե նրանք հարձակվում են իրենց վրա, և նրանք ընդհանրապես ապաշխարություն չեն ցուցաբերում, ապա նրանք պարզապես պետք է անմիջապես ազատվեն աշխատանքից։ Եթե նրանք չազատվեն աշխատանքից, աշխատանքը կուշանա։ Բացի այդ, առաջնորդներին և աշխատողներին թույլատրված չէ խմբավորումներ ձևավորել հանուն անձնական շահի կամ ներգրավվել խմբակային վեճերի մեջ, քանի որ սա լրջորեն խանգարում և անհանգստացնում է Աստծու տան աշխատանքը, և մի բան է, որից Աստված զզվում է և ատում է այն։ Անհավատ աշխարհի բոլորն իշխող կուսակցություններն ունեն ներքին պայքար. նրանք բոլորը ավազակախմբեր ու խմբակցություններ են կազմում և խմբավորումներ են ձևավորում հանուն անձնական շահի։ Նման բաները թույլատրված չեն Աստծու տանը։ Աստծու տանը ճշմարտությունն է իշխում։ Աստծու տունը չի կենտրոնանում որևէ մարդու վրա. այն կենտրոնանում է Քրիստոսի վրա։ Քրիստոսն է Եկեղեցու գլուխը։ Եթե անձնական ավազակախումբ կամ խմբավորում ես կազմում, սա հակաքրիստոսի գործելակերպ է, և դու դև ու Սատանա ես, ուստի պետք է վտարվես։ Սա պա՞րզ է։ (Այո՛։) Կա՞ն արդյոք առաջնորդներ և աշխատողներ ամբողջ աշխարհի եկեղեցիներում, ովքեր չեն ձգտում ճշմարտությանը։ (Այո՛։) Նրանց համար, ովքեր չեն ձգտում ճշմարտությանը կամ իրական աշխատանք չեն կատարում, մենք կարող ենք հաղորդակցվել ճշմարտության մասին նրանց հետ՝ օգնելու նրանց մի քանի անգամ և հնարավորություն տալու նրանց ապաշխարելու։ Եթե նրանք դեռ պատշաճ կերպով չեն կատարում իրենց աշխատանքը, ապա պետք է ազատվեն աշխատանքից, և ճշմարտությանը ձգտող մարդիկ պետք է ընտրվեն՝ փոխարինելու նրանց որպես առաջնորդներ և աշխատողներ։ Նրանք, ովքեր չեն ձգտում ճշմարտությանը կամ իրական աշխատանք չեն կատարում, պետք է որոշակի ողջամտություն ունենան և կամավոր հրաժարական տան։ Մի՛ կառչեք պաշտոնից և մի՛ ուշացրեք Աստծու տան աշխատանքը։ Եթե հրաժարվում ես հեռանալ առաջնորդի պաշտոնից հանուն քո հեղինակության և կարգավիճակի, և արդյունքում խոչընդոտում ես եղբայրների և քույրերի կյանքի մուտքը և արգելակում ես եկեղեցու աշխատանքը, մի՞թե չես վնասում Աստծու ընտրյալ մարդկանց և Աստծու տանը։ Ո՞ւր է քո խիղճը։ Ո՞ւր է քո ողջամտությունը։ Նման մարդիկ իսկապես եսասեր և ստոր են, և չունեն ո՛չ խիղճ, ո՛չ ողջամտություն։